I te wā o te KOWHEORI-19 i whakapau kaha ō tātou kaipāmu, ringa whakatipu, kaihanga wāina kia haere tonu te motu, ka mutu, ka noho mātuatua ki te whakaoranga o Aotearoa tonu. E taea ai e koe te whai wāhi mai. Kei te hiahiatia te hunga whai wheako, whai pūkenga, whai pānga whānui tonu, ahakoa nō hea, ahakoa ko wai.

Ko te hunga e kimi ana i te kōwhiringa mahi pūmau, te whakangungu, me ngā tū momo tūranga, ina koa, te hunga whānui o Aotearoa e noho kore mahi ana nā te KOWHEORI-19 te take.

E wātea ana ngā mahi puta noa i Aotearoa i ngā ahumahi kai, whītau anō hoki. Arā, ko te mahi pāmu, (miraka, kau, hipi), te tukatuka kai, te whakaputa wāina, te mahi ngahere, te kaimoana, me te ahumāra. Kei te wātea ētahi ināia tonu nei, arā anō ētahi, he akomanga whakamātau, whakangungu rānei i mua i tō tīmatanga. Ahakoa he mahi ā-kaupeka ētahi, he nui tonu pea ka noho hei tīmatanga o tētahi mahi pūmau tonu me ngā ara kia whakatipu, kia kōkiri whakamua hoki.

Ehara i te mea he ara i ngā tūranga ā-tuawhenua, ā-tinana anake. Arā anō ngā mahi i roto i te pūtaiao, te hangarau, te pakihi, te whakahaere, ngā wāhanga o ngā mahi whakahaere, te tiaki kararehe, te tauhokohoko, te rangahau, me te whanaketanga. He whānui ngā tūranga mahi, ka mutu, he mahi whakaongaonga te mahi, me te mahi pūmau nei. Arā anō te nui kua kore pea e whakaarotia e koe. 

He mea tino nui te ahumahi Hanga, Hanganga hoki me ngā momo, kōwhiringa tino mīharo. He nui ngā kaimahi e tino hiahiatia ana mō tēnei ahumahi - he mahi haere tonu hoki tēnei.

Mehemea he ākonga whai kiko, he tangata pai ki te tangata, he rawe hoki te mahi ā-tīma ki a koe -  koinei pea te ara ahumahi māu.

He nui ngā ara i tēnei ahumahi. Ka tīmata hei kaimahi i mua i te whakapikinga ki te kaea, te kaiwhakahaere, te pou whakahaere rānei. Whakawhanaketia ō pūkenga toa kaipakihi, ka taea hoki pea te tīmata i tō ake pakihi. Te whai mahi hei kaiwhakahoahoa, kaipūkaha, pou whakahaere kaupapa ranei, e taea ai pea ngā mea katoa i tēnei tū ahumahi.

Mehemea he pai ki a koe te whakapau kaha ki te mahi, he tangata whakanui i te tangata anō, he kounga te āhua o tō mahi, he mātau ki te whakatutuki i ngā tūmanako o ētahi atu tāngata, e taea ai e koe te whiwhi pūtea pai.

I roto i te ao ahumahi ratonga ko te taha manaaki, te hāereere me te tāpoi, te makawe me te whakapaipai, te hokohoko, ngā hākinakina me ngā mahi ā-rēhia, ngā takahanga, te pūrongorongo, te pānui whakatairanga, ngā mahi whakahaere, arā noa atu.

Mehemea he ākonga taunga ki te tangata koe -  koinei pea te ara ahumahi māu.

I te ahumahi ratonga ka taea te ako, te tipu, mā te pukumahi e piki ai tō tunga. Kāore e ārikarika ngā ara mō te whakangungu i a koe e mahi ana hei āwhina i a koe ki te whakapiki. Ka tīmata pea hei kaihari pēke i tētahi hōtēra, katahi ka piki ake ki te tūranga o te kaiwhakahaere, katahi te pou whakahaere i mua i tō tahuri ki te whakatū i tō ake hōtēra. E taea ai ngā pūkenga ka riro i a koe te whakawhiti atu ki mahi kē, ka mutu, ka whaihua anō hoki i ngā tini tūranga. Ka tūtaki, ka mahi hoki koe i te taha o ngā tāngata whakaihiihi, ka tini hoki ngā momo āhuatanga o tō mahi.

Ka nui hoki ngā ara harangotengote i tēnei rāngai, anō te pai mehemea kei te hiahia mahi koe i a koe e whakatutuki ana i ētahi atu mātai.

Ko te kaiwhakawhiwhi mahi mutunga kē mai tēnei ahumahi i Aotearoa, he wāhanga e tipu haere ana nō reira e kīia ana he mārama te ara pai ki te ānamata.

He tere te hurihuri o te ao hangarau me te whakawhitinga kōrero ā-matihiko, e whātoro atu ana hoki i ngā ahumahi, ka mutu, he matua ki te ānamata o Aotearoa. Nā te tokoiti o ngā kaimahi whai pūkenga i ēnei ahumahi, e tino hiahiatia ana te hunga e mahi ana, e ako ana hoki ki te whai ara mahi pūmau ki te rāngai hangarau.

Mehemea e kaingākau ana koe kia mōhio he pēhea te mahi ā tēnā, a tēnā, he pākiki, he māhorahora hoki ō whakaaro - he ara pea tēnei māu.

He whakaihiihi i te ngākau, he nui ngā momo taha, he nui hoki ngā hua o ngā ara mahi pūmau i te ao hangarau, te pūkahatanga, me te pūtaiao. Ahakoa te ara mahi pūmau ā-whakanao, ā-hangarau rānei e taea ai te nuku atu i tēnā ahumahi, ki tēnā ahumahi, mahi ki te mahi nā runga i ngā pūkenga whakawhitiwhiti rawe rawa atu ka riro i a koe i runga i te haeranga.

Kei tēnei rāngai ko te ahuwhenua, te hangarau ahuwhenua, te mahi pāmu, te ahumāra, te whakanao whare miraka kau, te ngahere, te maina, te ahumahi kaimoana, te horonuku whenua, te tākuta kararehe me ngā tini ara mīharo anō.

He whānui, he rerekē hoki ngā momo mahi, ka mutu, he nui hoki ngā ara ako i ngā pūkenga hou. He rite tonu te puta mai o ngā āhuatanga hou nō te hurihanga tonutanga o te hangarau me ngā momo utauta. He rāngai nui mā te ōhanga Māori me te mea he nui tonu ngā ngahere, ngā wāhi hī ika, me ngā pāmu miraka kau e puritia ana, e whakahaeretia anō hoki e ngāi Māori.

Mehemea he ākonga koe e pai ana hoki ki a koe te whakapau wā ki waho i te taiao he tangata atawhai hoki i ngā mea ora, koinei pea te ara ahumahi māu.

He tini ngā momo tūranga i tēnei rāngai, i te ihu oneone, ki te ihu rorohiko, i te mahi me tō kotahi, ki te mahi ā-tīma rānei. Mehemea kāore koe i te mahi i runga i te whenua tonu, tērā pea he kaitohutohu e toro atu ana hei wāhanga o te ahumahi pērā te mahi arboriculture. Tērā pea he kaikaute, he kaiwhakatika waka, he tākuta kararehe rānei. Kāore e ārikarika ngā ara!

Kei raro i tēnei karanga o te ahumahi ko ngā ratonga hapori, toko i te ora hoki, te waonga, ngā ratonga whawhati tata, te atawhaitanga hauora, ngā rongoā, te rāngai kāwanatanga, te mātauranga, te whakamarumaru me te haumarutanga, tae atu ki Whānau Ora.

Ko ngā ara mahi pūmau i konei he mahi mā te hunga kaha ki te tautoko i te hapori, atawhai hoki i te tangata. Ka tūtaki koe ki ngā tāngata katoa, me ngā momo pakeke katoa, e ahu mai ana i ngā momo ao katoa. Ka whiu pea koe ki roto i ngā tūāhuatanga e tere whakarerekē ana, ka mate hoki pea koe ki te whakatakoto whakatau ahakoa te taumahatanga.

Mehemea he ākonga pai ki te tangata, he rawe hoki te mahi ā-tīma ki a koe, ka mutu, e hiahia ana kia whai hua tō āwhina i te tangata -  koinei pea te ara ahumahi māu.

He ahumahi tēnei e taea ai te whakawhanake, me te whakapiki i ngā pūkenga. Mehemea ngākaunui ana koe ki tō mahi, e hiahia ana hoki te ako tonu ka tere tō whakapikinga. Ka tīmata pea hei kaiāwhina, ka whiwhi pea i te tūranga kaea, katahi ka whakatūria hei pou whakahaere.